عمل الاشخاص بعجينة السكر

تورتة الجولف دة تورتة الفروض انشاء الله اعملها بكرة لزميل المدام فى العمل اللى طالع معاش وعملين له حفلة وعلشان هوايتة لعبة الجولف اخترنا ان التيمة للتورتة تكون لعبة الجولف. المهم امبارح عملت الشخص الراقد على بطنة وبينفخ فى الكورة علشان تخش, عملتها من عجينة اللوزالمضاف عليها معلقة من بودرة اللزق القابل للاكل وبعد كدة لونتها وشكلت منها البنطلون وبعدين الفانلة ثم الراس واليدين والجزمة وباقى التفاصيل اتمنى انها تعجب. بعد بكرة هخبز التورتة وهبقى احط الصور على البلج والفيس بوك.

طريقة عمل كريمة الزبدة لتغطية التورتات والكب كيك

هذة الطريقة هى الطريقة الى استعملتها فى كورس ويلتون تزيين التورتات الكورس الاول :
١٩٠ جرام كريسكو ( نوع من انواع الزبد النباتات) ٧-٨ م.ص. ماء ٤٥٠ جرام سكر بودرة ١ م.ص. مكسب طعم ( زبدة - لوز - فانيليا ) ١ م. ك. ما رينج ( مستخلص البيض )

يتم ضرب الزبدة اولا مع الماء ومكسبات الطعم بالخلاط حتى يندمج مع بعض ثم يضاف المارينج على السكر مع ذرة ملح ويضاف على الخليط السابق ويخلط حتى يمتزج تماماً ، حوالى ثلاث دقائق على سرعة متوسطة. يحفظ فى الثلاجة فى علبة مغلقة حتى يتم استعماله . يعتبر هذا المزيج مركز ويستعمل لعمل الورد على التورتات ولتزويق جوانب التورتة يتم تخفيفها بإضافة ملعقة صغيرة ماء ولتغطية التورتات بالكريمة يتم تخفيفها مرة اخري بملعقة ماء صغيرة ثانية.

راس السنة

فى راس السنة اللى فاتت كانت عائلة مراتى عندنا والحلو كان علينا. عملت ليهم أطباق من الشيكولاتة بها بافارواز الموز وكور من عجينة اللوز ملونة بلون احمر وعليها خطوط بيضاء مع بودرة تلميع وورق شجر من نفس عجينة اللوز. أنا بجيب العجينة بلونها الطبيعى الى هو فى الغالب ابيض كريمى و بلونها بألوان مخصصة للأكل .

وفى عيد ميلاد حماتى

وفى عيد ميلاد حماتى عملت الكب كيك وزوقتهم على شكل الكلب بتاعها, خليها تنبسط بقة.

فى عيد ميلادى

وعند عيد ميلادى احترت اعمل اية,وفى الاخر وقع الاختيار على توتة فندانت بالرسوم الفرعونية,مع الكب كيك على نفس الشكل.

أحلى بسبوسة

أحلى بسبوسة بسبوسة الشيف حسن بصراحة حازت اعجاب ناس كتيير لما عملتها وبنتى بتموت فيها ( طبعا مع الآيس كريم) وزملاء العمل طلبوها منى كتير.

وعدد 2 تورتة وعيد ميلاد جديد

وعيد ميلاد مراتى عملت بدل التوتة اتنين واحدة لشغلها واخرى مع العائلة.

تانى ابداعاتى

وهذه كيكة أخرى قمت بتزينها فقط بمجموعة من الورود التى صنعتها من عجينة السكر او الفندانت حسب ما نسميها هنا .

اول تورتة.

أول تورتة عملتها لحماتى فى عيد ميلادها بعد ان اعجبتنى طريقة استخدام عجينة السكر فى تزيين التورتات والتى رايتها فى أحد المعارض المتخصصة للهوايات فى هولندا حيث اقيم مع زوجتى وابنتى ياسمين .